Final of Anatomy and Histology | دفعة اعدادي

تنبيهات مهمة جدا لازم الكل يعرفها (لو قريتها قبل كدا عديها)

* عشان محدش يجي يقول بعد اي امتحان «اصل فادي قال كذا وضيعنا و و و » انا مش مسئول مسئولية كاملة 100 % ع المعلومات الموجودة تحت لان اغلبها كلام زملاء معانا ف الدفعة وناس كانت بتحضر.. دا غير غدر الدكاترة محدش يعرفلهم 😂 .. مش بخوفكم بس اقصد انبه ان لو حد شايف حاجة غلط ياريت يبلغني ف الكومنتات وانا هغيرها .. وياريت اللي عنده معلومة مفيدة مش موجودة يبلغني برضو اضيفها وبلاش تخبوا معلومات لنفسكم وشغل ث.ع. خلي ربنا يكرمكوا ومتقلقوش كل واحد هياخد نصيبه ف الاخر .. انما غير كدا انا مش ملزوم اني اجاوبلكم ع اسئلة ف المنهج .. دوري اني اجمعلكم كل المعلومات اللي بتتقال ف الشات والكومنتات والملفات وكدا بس .. تقدروا تسألوا بعض ف الشات او ف البوست المخصص لكل مادة وجاوبوا ع بعض
* محدش يحبط حد ولسة بدري وبلاش شغل مش مذاكر وكدا .. كل المطلوب منك انك تبدأ بجد من دلوقتي وتيجي ع نفسك فترة الأمتحانات لحد اما نخلص يوم 8 /6 بس .. الحاسب وعلم النفس ميعملوش حاجة 😅

* انا رفعت كل الداتا «ملفات الpdf والpower point» للناس اللي متعرفش .. ودا بوست الفيس متجدد عشان هنبه ف الكومنتات ع الملفات اللي هضيفها جديدة كل فترة وهتلاقوا فيه طريقة التحميل  .. اللينك 

$$$$$$$$$$$$$$$$$$$$$$$$$$

لما اقول «حمل من هنا» مثلا وتلاقوا لونه احمر تبقوا اضغطوا ع الكلمة نفسها عشان تفتحوا صفحة التحميل 😀👌

حل مشاكل التحميل :-

* طريقة التحميل : بعد م تفتحوا صفحة التحميل .. هتدوسوا علي السهم اللي نازل تحت والتحميل هيبدأ علطول
* افتحوا الصفحة من متصفح Google Chrome تجنبًا لمشاكل كتير

* لو عندك ع الموبايل برنامج Google Drive امسحه او الغي تفعيله

* الملفات مضغوطة بصيغة .zip واغلب الموبايلات بتقدر تفك ضغطها بدون برامج (هتعمل extract) للملف او تقدر تدخل تتصفحه علطول ،، او حمل برنامج winRAR

* اتأكد ان النت سريع ولما التحميل يبدأ متقفلش البرنامج وخليه مفتوح قدامك لحد اما يخلص التحميل

$$$$$$$$$$$$$$$$$$$$$$$$$$

اول حاجة بس دا الباور ومش لازم تذاكر منه بس لو حد محتاج صور للتوضيح وبالنسبة للزيادات اللي عن الكتاي معتقدش انها هتييجي لان غالبا اللي هيحط الامتحان هيبقي قدامه الكتاب مش الباور

باور محاضرات الاناتومي تقدر تحمله من هنا
باور سكشن الاناتومي تقدر تحمله من هنا
باور محاضرات الهستو تقدر تحمله من هنا

الاناتومي

الامتحان يوم الاحد الجاي 26 / 5 / 2019 من 1 ل 4

كل امتحان عليه 60 درجة ( اناتومي وهستو)

* نظام الامتحان السنة اللي فاتت كان كدا :-

اختياري -اكمل -صح وغلط-ومقالي بس مش كتير يعني كان في مقارنه وتقريبا واحده عدد-ورسمه او رسمتين وتملا البيانات بتاعتها-وتقريبا كان في توصيل

* هنذااااااااكر منين

الكتاب طبعا المفروض المصدر الاول ومن الجلدة للجلدة عشان الشفوي

ودي فيديوهات اناتومي فيها شبه كبير من منهجنا وساعات بتبقي مختصرة بس للي حابب يتفرج عليها وعشان يحسن نطق الكلمات قدام الدكتور ف الشفوي بدل م يحفل عليك 😂 تقدر تشوفها من هنا

طب مفيش وقت و و و .. لو شديت ع نفسك هتقدر واي مذكرات برا مش هتبقي ملمة 100% الكتاب كله .. بس تقدر تذاكر من التخليص والاسئلة والامتحانات والصور وتظبطهم وف الاخر برضو ترجع للكتاب تعدي عليه وتشوف الحاجات اللي مش عارفها فيه بما ان الواحد بيفهم ويقدر يحفظ من التلخيصات المنظمة اكتر من الكتاب واعمل limit ومتنساش نفسك والاناتومي اسهل من الهستو بكتييير

** الشفوي
عليه 20 درجة
غالبا تاني يوم بعد الامتحان زي السنة اللي فاتت بس لسة مش عارفين
*بالنسبة لجزء الـ Bones ناس كتير بتسأل هييجي ف النظري ؟؟
مفيش كلام مؤكد بس غالبا بييجي شفوي .. وطالما هنمتحنه شفوي فـ هنذاكره بالمرة .. لو اتزنقت براحتك بقي لو عايز تفك منه وانت وحظك ف النظري (وغالبا هيبقي عليه درجة قليلة ف الفاينل اذا جه)
*هتلاقوا ف جروب التليجرام فيديوهات المعيدة وهي بتشرح الـBones
* بالنسبة للي لصور سكشن مراجعة الاناتومي .. تقدر تحملهم PDF من هنا

بالنسبة للاسئلة هتلاقوها تحت خالص مع الهستو

$$$$$$$$$$$$$$$$$$$$$$$$$$

الهستو

عليه 60 درجة
*هنذاااكر ازاي ؟؟
اه الاسئلة بتتكرر كتييييييير وهتذاكر التلخيصات واسئلة الـShort notes والمقارنات وتحل امتحانات السنين اللي فاتت (كلهم هتلاقوهم في جزء الاسئلة تحت شوية)
هسيبلكم بحر اسئلة وانزلوا عوموا فيه .. هتتعبوا بس ف اول مذكرة وبعد كدا هتلاقوا الاسئلة بتتكرر كل شوية ف المذكرات التانية والامتحانات .. بس بعد م تخلصوا دا كله  خلاص عرفتوا شكل اسئلة الامتحان بتيجي ازاي ترجعوا للكتاب وتشوفوا الحاجات اللي مش عارفينها فيه لان فيه اسئلة mcq وصح وغلط
بقول كل شوية (ترجعوا للكتاب ف الاخر) لانه المفروض المصدر الاول بس مش هتعرفوا تذاكروا منه وتفهموا .. لما ترجعولوا ف الاخر هتكونوا فهمته اغلبه
مقدرش اقولكوا ادخلوا بأسئلة بس .. اينعم احتمال كبير تعدوا النص ف الهستو بالاسئلة بس مفيش حاجة مضمونة أو مؤكدة وكل واحد يخاطر براحته

* المقدمة علينا ؟؟ غالبا لأ (مفيش حاجة مؤكدة) .. بس لو معاك وقت ذاكرها

*الوقت مزنووق جدا ولو مبدأتش لازم تبدأ علطول دلوقتي

*الاسئلة بتيجي ازاي ؟
٤٠ درجة مقالي و١٠ صح وخطا و١٠ اختياري
ال٤٠ درجة مقالي بيكونو حاجات متكررة

* الهستو بيتنسي بسرعة عادي متتخضوش 😅

$$$$$$$$$$$$$$$$$$$$$$$$$$

الاسئلة والتلخيصات والامتحانات

لو مذكرة عجبتك احتمال كبير تلاقيها موجودة عند مكتبة (عمانوئيل) جمب مطعم (onions)
الصور ان شاء الله كلها واضحة

أول حاجة صور الاناتومي اللي هنكمل بياناتها تقدر تحملها من هنا

"انا تجاهلت صور العظام لان هيا عموما مش بيجي منها حاجة وطبعا كونا كدفعة ٥٨ فمش عارف هل هنبقى الضحية ولا لا فَلَو فكرت أصورها هصور كل صور الكتاب يعني ف بس" كلام زميلنا ايهاب

مذكرة تلخيص الاناتومي حلوة حملها من هنا

اسئلة mcq اناتومي مهمة جدا حملها من هنا

اسئلة short notes اناتومي حملها من هنا

مهم جدا جدا : امتحانات تمريض وصيدلة قنا (او جنوب الوادي) السنة اللي فاتت (الامتحان بتاع صيدلة كان بوكليت بس هتلاقوا اهم الاسئلة اللي جات) .. واغلبكم سمع ان الدكتورة اللي بتحطلهم الامتحان هي برضو اللي بتحطلنا الامتحان وبييجي حاجات منه كتيير .. الصور متكررة عشان في صور جودتها احلي من التانية وكدا .. تقدر تحملهم من هنا

مفاجأة : امتحان تمريض قنا بتاع السنادي 2019 لسة ممتحنينه النهاردة .. تقدر تحمله من هنا
واستنوا بكرا ان شاء الله صيدلة قنا هيمتحنوا اناتومي وهستو وانزلكم اللي جه 

امتحانات توجيزر اناتومي وهستو حملهم من هنا

اسئلة short notes هستو محلولة حملهم من هنا

اسئلة هستو وبعض الاسئلة محلولة من زميل 56 حملهم من هنا

امتحانات اناتومي وهستو من موقع الكلية حملهم من هنا

امتحان هستو كلينك 2017 حملهم من هنا

مهمين جدا جدا : امتحانات هستو 2014 و2015 و2016 و2017 و2018 وقنا 2017 + حل 2016 حملهم من هنا

* مش لازم تلتزم بطريقة المذاكرة اللي قولتها فوق علفكرا بس انا بقولكم اللي فيها .. واللي عايز يذاكر بطريقة تانية او اي حاجة براحته طبعا دي مسئوليته هو

بس كدا وف الاخر بنشكر كل القائمين ع العمل دا سواء ناس من دفعتنا او الاكبر مننا ودا كان تلخيص فيه تجميعة من معلومات وخبرات ناس كتير 

Prepared By / Fady Anwar

Pray for me 😁

Family 58 😍💪